SOLO INDUSTRIAL

Valoramos positivamente que o Goberno galego poña en marcha un programa de incentivos destinado a ofrecer solo industrial accesible, máis barato e en mellores condicións de pagamento, procurando, ademais, vías de colaboración con todos os axentes implicados.

Deste xeito, involúcrase a todos no obxectivo de que os que queiran investir en solo empresarial en Galicia saiban onde poden facelo xa que, neste momento, é máis barato que nunca levalo a cabo.

A posta en marcha deste proxecto responde á constatación de que, a pesar do descenso da actividade económica, existe demanda de solo industrial e en 2012 vendeuse maior superficie que en 2011.

Así mesmo, estas medidas supoñen dar un paso máis para impulsar o emprendemento a través dun mellor acceso ao solo industrial.

Descontos e facilidades de pagamento

Os descontos e facilidades para pagar o solo industrial van desde bonificacións do 5% do prezo da parcela para os interesados ou os que se inscriban no rexistro de demandantes, a descontos por pago ao contado por volume de compra que poden ser de ata o 10%, con bonificacións extra do 5% por compras superiores a 500.000 euros. Ademais, nos casos de operacións que engloben tres ou máis parcelas haberá un desconto adicional doutro 2%.

Xunto con isto, no caso das naves e industrias emprazadas fóra de ordenación, establécense condicións especiais para facilitar o traslado a polígonos industriais de acordo coa normativa urbanística. Neste caso, a achega dos Xestures será dun desconto do 3% sobre o prezo de venda que se ven sumar aos descontos anteriores. 

Tamén se ofrecerán parcelas singulares a baixo prezo, con descontos que oscilan entre o 5 e o 50%.

 Polo tanto, estamos cunha batería de descontos que serán de media do 20%, cun mínimo no contorno do 5% e un máximo do 50%.